Dalandan

DALANDAN

kalahating kilong dalandan ang binili

ko kanina nang mapadaan sa palengke

sisenta pesos, limang laman, isa'y dose

aking panghimagas dahil bawal ang karne

nakaraan ay paboritong abukado

sinturis naman ngayon ang pinapapak ko

upang sa pagkain ako'y maging ganado

at lunas na rin sa damang sipon at ubo

nang makita kanina'y di na nakatiis

di nag-atubili't binili kong mabilis

itong dalanghita, dalandan o sinturis

na sabi ng iba'y pampakinis ng kutis

ganyan ang ginagawa ko, imbes tabletas

aba'y ang kakainin ko'y maraming prutas

pagkat kailangan ko'y natural na lunas

upang karamdaman ay di na mababakas

sa ganitong prutas ay tiyak na lulusog

baka naman katawang payat ko'y bumilog

tila sa kalusugan ko'y kaygandang handog

upang mamayang gabi'y sumarap ang tulog

- gregoriovbituinjr.

08.07.2024

Palaisipan

PALAISIPAN

pinakapahinga ko / iyang palaisipan

sa aking bisyong ito / sana ako'y pagbigyan

patawarin sakaling / ito na'y kasalanan

datapwat mahalaga'y / di tayo nang-iiwan

pinakapahinga ko / sa dami ng trabaho

aking pagsagot nito'y / kapara ng Sudoku

o Word Connect sa selpon, / libangan kong totoo

upang makapagnilay / at di naman manlumo

buti't palaisipan / ang bisyo ko, di yosi

o araw-gabing toma / kasama nina pare

sa krosword nga'y di galit / maging iyong kumare

ika niya, krosword nga'y / may magandang mensahe

mabuting ehersisyo't / nahahasa ang utak

malalamang salita'y / luma, bago't palasak

at tatalino ka pa, / di gagapang sa lusak

magsagot ka lang nito, / pamilya'y magagalak

- gregoriovbituinjr.

08.06.2024

Ang pinaghirapang ginto ni Yulo

ANG PINAGHIRAPANG GINTO NI YULO

dalawang Olympic Gold ang maiuuwi

ni gymnast Carlos Yulo na dangal ng lahi

anang ulat, Caloy, ikaw ay binabati

ng pangulo, pagkat nakamit mo ang mithi 

sadyang pinaghirapan mo ang Olympic gold

di lang isa, kundi dalawa ang iyong gold

habang pangulo'y mayroon daw Tallano gold

di pa makita ng bayan ang nasabing gold

dahil sa sipag, talino't loob mong buo

nakamit mo ay dalawang medalyang ginto

pangulo naman noon pa'y pulos pangako

bente pesos na kilong bigas nga'y napako

naukit na, Carlos Yulo, ang pangalan mo

sa kasaysayan ng isport ng bansang ito

di tubog sa ginto, tiyak tunay ang gold mo

tanging masasabi'y pagpupugay sa iyo

- gregoriovbituinjr.

08.05.2024

Ang bilin sa bababa ng van

ANG BILIN SA BABABA NG VAN

napakasimpleng bilin lamang

nitong tsuper sa pasahero

magsabi pag bababa ng van

ang nasa upuan sa dulo

bilin pa iyong nakapaskil

kaylaki, mababasa't lantad

kung nais pumara'y titigil

tsuper ay sabihan lang agad

buti't may ganyang karatula

napakalinaw ng mensahe

sabihin kung saan papara

at maiwas sa aksidente

sa tsuper, maraming salamat

bilin sa pasaherong mulat

- gregoriovbituinjr.

08.05.2024

Pangalawang ginto ni Yulo sa Paris Olympics

PANGALAWANG GINTO NI YULO SA PARIS OLYMPICS

mabuhay ka, Carlos Yulo, sa iyong bangis

nang kamtin mo'y pangalawang ginto sa Paris

Olympics, pinakita'y husay na kaykinis

habang iba pang atleta'y nakipagtagis

sa boksing, namaalam si Carlo Paalam

sa bansa'y dating nag-uwi ng karangalan

si Nesthy Petecio't Aira Villegas naman

sa women's boxing, may medalyang makakamtan

sa gymnastics, Caloy, ibinigay mong buo

ang galing mo sa ipinamalas na laro

mula sa floor exercise ang una mong ginto

mula sa vault finals ang ikalawang ginto

laging una ang Pilipino Star Ngayon

sa balita ng tagumpay ng iyong misyon

sa ibang dyaryo, unang ginto pa lang doon

habang kaybilis mag-ulat ng Star Ngayon

sa iyo, Carlos Yulo, kami'y nagpupugay

di magkamaliw ang bayang saludong tunay

sa dalawang gintong medalyang iyong taglay

ang sigaw ng bayan, mabuhay ka! mabuhay!

- gregoriovbituinjr.

08.05.2024

* litrato ng pahayagang Pilipino Star Ngayon, Agosto 4 at 5, 2024

Pansit bato

PANSIT BATO

ang ramdam ko'y batong-bato

sa panahong tulad nito

at nakita ko sandali

ang kanyang kaygandang ngiti

hanggang siya na'y lumapit

hinainan akong pilit

minasdan ko ang nilatag

di mawari't nasa hapag

ang tanong ko, "Ano ba 'to?"

sagot niya, "Pansit bato"

nagluto siya ng pansit

nang ulo ko'y di uminit

hain niyang pansit bato

ay tama lang sa tulad ko

- gregoriovbituinjr.

08.04.2024

Alaala ng Rizal Memorial Coliseum

ALAALA NG RIZAL MEMORIAL COLISEUM

Masasabi kong halos laki na rin ako sa Rizal Memorial Coliseum sa Malate, Maynila. Dahil noong hayskul ako'y lagi kaming magkakaklaseng nagpupunta roon upang suportahan ang aming mga atleta sa paaralan, ang Letran Squires na manlalaro ng hayskul at Letran Knights na manlalaro ng kolehiyo sa National Collegiate Athletics Association (NCAA) mula 1981 hanggang 1985. Nagkampyon sa basketball ang Letran ng tatlong magkakasunod na taon noong naroon pa si Avelino "Samboy" Lim.

Mula sa Lawton ay sasakay kami ng biyaheng Quiapo tungong Dakota Harrison at bababa malapit sa Rizal Memorial Coliseum, at lalakad na papunta doon. Talagang pinanonood namin noon ang laban ng Letran, at nagti-cheer ng "Arriba Letran!"

Noong 1982, nakasama ako sa 4th National Taekwondo Championship sa Rizal Memorial Coliseum kung saan kabilang ako sa team ng Letran. Noong 1984, naglaro rin ako sa NCAA sa sports na track and field bilang kinatawan ng Letran. Tinakbo ko pa noon ang 400 meter na obal sa track and field.

Nabigyan man ako ng ilang pagkakataon bilang atleta, hindi naman iyon nagtuloy-tuloy dahil naiba ang ihip ng hangin. Nang ako'y magkolehiyo na sa ibang paaralan, iba na ang aking pinagkaabalahan, at mas tinutukan ko ang ibang bagay.

Hanggang sa makapasok sa isang vocational school na nagdala sa akin sa Hanamaki-shi, Iwate Ken, sa Japan, para sa anim-na-buwang scholarship program. Matapos iyon ay kinuha ako't naging regular na manggagawa bilang machine operator sa Precision Engineered Components Corporation (PECCO) sa Alabang, Muntinlupa at nagtrabaho roon ng tatlong taon mula Pebrero 1989 hanggang Pebrero 1992. 

Nang mag-resign ako sa PECCO, nag-aral muli ako sa kolehiyo noong 1992 hanggang maging aktibo sa kilusang masa. At noong 1997 ay nag-pultaym na bilang aktibista hanggang ngayon.

Naaalala ko ang pagiging atleta ko noon. Kaya humahanga ako sa mga atletang Pinoy na nagsimulang maglaro sa Rizal Memorial Coliseum, na lunsaran noon ng mga magiging kinatawan ng bansa. Sana'y maging matagumpay sila sa kanilang larangan at magkampyon sa mga internasyunal na kumpetisyon.

Mabuhay ang mga atletang Pinoy! Mabuhay ang makasaysayang Rizal Memorial Coliseum! Mabuhay ka, Paris Olympics gold medalist Carlos Yulo!

08.04.2024

* litrato mula sa google

* Komentong akda sa kawing na:  https://www.facebook.com/photo/?fbid=10227557352453003&set=a.2024741771766 

Hidilyn Diaz at Carlos Yulo

HIDILYN DIAZ AT CARLOS YULO

dalawang larawan ng nagkamit ng ginto

sa Olympics, nangarap sila't di nabigo

si Yulo sa Paris, si Hidilyn sa Tokyo

pinagsikapan nila'y nakamtan ng buo

ginto'y nakamit ni Hidilyn sa weightlifting

animo'y ginising niya ang bayang himbing

sa gymnastics, pinakita ni Yulo'y galing

mula sa bansa ng bayaning magigiting

ako'y nag-selfie sa larawan nilang iyon

na na-headline sa Pilipino Star Ngayon

dahil naging tagumpay ang kanilang misyon

sa gintong medalyang mithi mula pa noon

dalawang atletang pinakita ang husay

sa Olympics hanggang makamit ang tagumpay

sa atletang Pinoy, bayan ay nagpupugay

salamat sa kanila, mabuhay! MABUHAY!

- gregoriovbituinjr.

08.04.2024

* litrato mula sa pahayagang Pilipino Star Ngayon, Hulyo 27, 2021, at Agosto 4, 2024

Anong inaamoy ni alaga?

ANONG INAAMOY NI ALAGA?

nakita ko na naman si alaga

inaamoy-amoy ang aking gamit

sarado iyon, baka ba may daga?

baka ba nginatngat ang aking damit?

subalit agad siyang natigilan

nang aking tinig ay marinig niya

kung siya'y makapagsasalita lang

baka sabihin, "bag mo'y tingnan muna"

baka may naamoy na ulam doon

na nalimutang nasa loob ng bag

naiwan ko pala'y pritong galunggong

ilabas ko na't sa kanya'y ihapag

salamat, Lambing, sa paalala mo

baka nga daga'y sirain ang bag ko

- gregoriovbituinjr.

08.03.2024

* mapapanood ang bidyo sa kawing na: https://fb.watch/tKPWM_1xff/ 

Turmeric juice

TURMERIC JUICE

nabili ko'y ilang piraso

ng luyang dilaw o turmeric

isang piraso'y ginayat ko

nilaga kong may pagkasabik

sa katawan ay pampalakas

panlaban daw sa diabetes

masustansya raw itong wagas

umano'y di magka-heart disease

pinakuluang luyang dilaw

sa umaga ko iinumin

dapwa't di naman araw-araw

kundi salitan lalagukin

tinatawag na turmeric juice

na iinumin pagkabangon

kayrami pang dapat matapos

kalusugan ko'y aking misyon

dapat mabuhay pang matagal

tungong edad pitumpu't pito

sa nobela pa'y nagpapagal

pag natapos ko'y ililibro

- gregoriovbituinjr.

08.03.2024

* ilang sanggunian:

https://hellodoctor.com.ph/fil/masustansiyang-pagkain/nutrition-facts-fil/luyang-dilaw-anu-ano-ang-mga-benepisyo-sa-kalusugan/ 

https://ph.theasianparent.com/luyang-dilaw-benefits 

https://fb.watch/tJd0zEraV2/ 

Pananghalian

PANANGHALIAN

sardinas na'y muli kong ginisa

at agad inihain sa mesa

pagkat gutom na itong nadama

di sapat ang kain sa umaga

sa gutom ay di na nakatiis

ang tiyan ko't katawang kaynipis

buti't may nabili na si misis

na delatang sa gutom papalis

kanina'y nakapagsaing na rin

kaya ulam lang ang lulutuin

matapos ang mahabang sulatin

ang gutom na'y dumalaw sa akin

kain agad nang ito'y maluto

puso ko'y sumigla sa pagsuyo

at mata ko'y di na lumalabo

gutom na'y unti-unting naglaho

- gregoriovbituinjr.

08.02.2024

Ginisang sardinas

GINISANG SARDINAS

niluto kong muli ay ginisang sardinas

na sahog ay kamatis, bawang at sibuyas

umano'y pagkain ng mga nasalanta

bagamat nabili sa tindahan kanina

sardinas ay pagkain daw ng mahihirap

pantawid gutom bagamat di raw masarap

isipin mo na lang daw na malasa ito

na nakabubusog din kahit papaano

O, sardinas, sa lata'y piniit kang sadya

upang dukha'y may makain at guminhawa

may pagkain din ang nasalanta ng unos

upang bituka'y di parang nanggigipuspos

salamat, sardinas, ikaw ay naririyan

na aming kasangga, saanman, kailanman

- gregoriovbituinjr.

08.02.2024

* mapapanood ang bidyo sa kawing na: https://fb.watch/tI7vXy-LeF/ 

Liwayway ng panitikan

LIWAYWAY NG PANITIKAN

ngayong Buwan ng Wika'y ating pagpugayan

ang ambag nitong Liwayway sa panitikan

narito ang magagaling sa pasulatan

at maraming sumikat na dito dumaan

sanaysay, komiks, kwento't tula'y naririto

manunulat ay talagang hahangaan mo

pati alagad ng sining at potograpo

may nobela pang pinelikulang totoo

noon nga'y lingguhan, magasing pampamilya

malaki't malapad pa ang kanyang itsura

ngayon, ito'y lumiit, naging buwanan na

ngunit Liwayway pa ring ating mababasa

maraming salamat, nariyan ka, Liwayway

dahil ating literatura'y natutunghay

hanggang ngayon, kami rito'y nakatugaygay

sa iyong nobela, kwento, tula't sanaysay

- gregoriovbituinjr.

08.02.2024

Bayaning aso't pusa

BAYANING ASO'T PUSA

buti't naagapan ang bahay ng matanda

na muntik-muntikan nang lamunin ng apoy

buti't nag-ingay ang alagang aso't pusa

kundi'y naagnas na ang bahay, ay, kaluoy

buti't may mga alaga siya sa bahay

na kapuso't kapamilya na kung ituring

buti't ang kanyang mga alaga'y nag-ingay

kaya naalimpungatan sa pagkahimbing

kaya sa ikalawang palapag nagpunta

bakit nag-iingay ang alaga'y nalantad

bahagi ng bahay ay nasusunog pala

kaya tinangka niyang apulain agad

subalit di kinaya, kaya nagpatulong

at bumbero'y agad inapulang mabuti

ang apoy na kabahayan na'y nilalamon

salamat, nag-ingay ang aso't pusang saksi

- gregoriovbituinjr.

08.02.2024

* ulat mula sa pahayagang Abante Tonite, Hulyo 25, 2024, pahina 2

Wikang Filipino: Wikang Mapagpalaya

WIKANG FILIPINO: WIKANG MAPAGPALAYA

kayganda ng tema ngayong Buwan ng Wika

Wikang Filipino: Wikang Mapagpalaya

wikang gamit ng maralita't manggagawa

nagkakaunawaan sa wika ng madla

wikang bakya, ayon sa mga Inglesero

masakit pa, wika ng alipin daw ito

wika ng mababang uri't minamaltrato

wika raw ng walang pinag-aralan ito

huwag nating hayaang ganito ang turing

ng mga Ingleserong animo'y balimbing

wikang Filipino'y wika ng magagaling

huwag payagang ito'y aapi-apihin

wikang Filipino'y gamit sa panitikan

gamit sa kapwa't pakikipagtalastasan

wika ng mga bayani sa kasaysayan

wikang mapagpalaya ang wika ng bayan

sa lahat ng manunulat, mananalaysay

sa lahat ng kwentista, mabuhay! MABUHAY!

sa lahat ng mga makata, pagpupugay

sa lahat ng manggagawa't dukha, MABUHAY!

- gregoriovbituinjr.

08.02.2024

Sandaang piso lahat

SANDAANG PISO LAHAT

kanina'y nagtungo akong palengke

pawang gulay ang aking pinamili

isang tali ng talbos ng kamote

sibuyas, kamatis at okra pati

kahit alam kong presyo'y nagmahalan

aba'y nakabibigla pa rin naman

presyo ng mga iyon ay sandaan

ngunit iyon na'y aking hinayaan

kamatis nga'y nagmahal na talaga

mantakin mo, isa'y sampu piso na

sampung pirasong okra, dos ang isa

sampu ang santali, laman ay lima

apat na sibuyas ay bente pesos

kapresyo rin ng santali ng talbos

kumpara sa karne, mura nang lubos

sapat lang para sa tulad kong kapos

- gregoriovbituinjr.

08.01.2024

Nasalanta

NASALANTA

kumusta na ang nasalanta

ng kaytinding bagyong Carina

sana'y nasa ayos na sila

salubong ay bagong umaga

kaytindi ng mga balita

La Mesa Dam ay apaw daw nga

at lagpas-tao pa ang baha

dito sa Kalakhang Maynila

dapwa't laking Maynila ako

Sampaloc ang kinalakhan ko

lugar na kaybabang totoo

baha pag dinalaw ng bagyo

ingat po kayo, kababayan

sana tayo'y magkatulungan

nagbabagong klima'y nariyan

at di na natin maiwasan

- gregoriovbituinjr.

08.01.2024

* ulat mula sa pahayagang Abante Tonite, Hulyo 25, 2024, p.3

Ang mahabang paglalakad

ANG MAHABANG PAGLALAKAD

ang mahabang paglalakad / ay sadyang nakakapagod

ngunit kung sa bawat hakbang / ay may itinataguyod

na isyu ng dukha, masa, / klima, ako'y nalulugod

tulad na lang ng Climate Walk, / ah, di ako mapapagod

sasamahan ko rin pati / nagmamartsang magsasaka

maging mga katutubong / hustisya ang ninanasa

na ang lupaing ninunong / ipinaglalaban nila

ay maipagtagumpay na't / karapata'y makilala

patuloy ako sa lakad / at tatahakin ang landas

daan mang masalimuot, / bawat gubat ma'y may ahas

tag-init man o tag-ulan / o sa panahong taglagas

pangarap ay aabutin, / may bungang sana'y mapitas

parang si Samwel Bilibit / na sa lakad ay patuloy

lakad lang ako nang lakad / nang walang paligoy-ligoy

at magtatanim ng binhi / sa lupa, di sa kumunoy

upang lumago't mamunga, / mukha man akong palaboy

kahit nakakapagod man / ang paglalakad na ito

ay magpapatuloy pa rin / tungo sa pupuntahan ko

ang pagkabigo't pagsuko'y / wala sa bokabularyo

tanging kamatayan lamang / ang pipigil sa tulad ko

- gregoriovbituinjr.

08.01.2024

To or Try

TO OR TRY

sagot ko sa Word Connect: TO OR TRY

parang try and try until you succeed

na kasintunog din ng DO OR DIE

kung iisipin ng tagamasid

subukan mo rin ang mag-Word Connect

at may matututunan kang bago

animo kaalaman mo'y siksik,

liglig, umaapaw na totoo

maraming salitang malalaman

sa isang salitang mabubuo

tila binalasang salitaan

o parirala ang mahahango

kaya subukan mo't mag-TO OR TRY

lalo't ang katulad mo'y magaling

kung di mo makuha, mag-DO OR DIE

at baka isipan mo'y magising

- gregoriovbituinjr.

08.01.2024

Upang magwakas ang kahirapan

UPANG MAGWAKAS ANG KAHIRAPAN

"But kings and mightiest potentates must die,

for that's the end of human misery."

~ from Henry VI, by William Shakespeare

sinulat na noon ni Shakespeare ang katotohanan

dapat elistista't burgesya'y mawalang tuluyan

nang magwakas ang pagsasamantala't kaapihan

na dinaranas ng sinuman at ng aping bayan

aniya, patayin ang mga trapo, hari't pari

silang nagpapasasa sa pribadong pag-aari

silang dahilan ng hirap ng inaaping uri

silang mapagsamantala'y sadyang kamuhi-muhi

ngunit may batas silang mga mapagsamantala

korte, senado, kongreso, pulis, ay kontrol nila

pati iyang simbahan, paaralan, at masmidya

upang mamamayang inaapi ay di mag-alsa

kaya dapat tayong kumilos tungong rebolusyon

upang mapagsamantalang uri'y mawala ngayon

kung nais nating mawala ang kahirapang iyon

dapat tigpasin ang ulo ng naghaharing leyon

baligtarin ang tatsulok, kalusin silang todo

salamat, William Shakespeare, at nauunawaan mo

gamit ang panitikan, sinulat mo ang totoo

kaya tulad kong makata sa iyo ay saludo

- gregoriovbituinjr.

08.01.2024