300

300

tila kami mandirigmang langgam

tatlong daang kawal laban sa dam

naglalakad na ang tanging asam

ay di matuloy ang Kaliwa Dam

buhay ang taya kaya tumutol

lupang ninuno'y pinagtatanggol

laban sa imbi, kuhila't ulol

na bulsa lang ay pinabubukol

kaya patuloy ang aming hiyaw

ang pagtutol sa dam ay kaylinaw

pag natuloy, parang may balaraw

sa likod ang tumarak, lumitaw

sa lakaran, malinaw ang pakay

na sadyang napakalaking bagay

ipagtanggol ang bukas at buhay

iyan ang aming adhikang lantay

- gregoriovbituinjr.

02.17.2023

* kinatha sa pinagpahingahang simbahan sa Brgy. Llavac, Real, Quezon, kasama ang makatang gala sa Alay-Lakad Laban sa Kaliwa Dam

Lugaw, sambalilo, tsinelas at kapote

LUGAW, SAMBALILO, TSINELAS AT KAPOTE

madaling araw ay nagising at umihi

ang lamig ng semento'y tagos ng masidhi

banig lang ang pagitan, ako'y hinahati

sakaling magkasakit ay di ko mawari

ikaanim ng umaga'y nais magkape

bago magkanin ay naglugaw muna kami

mayroong tsinelas, sambalilo't kapote

binigay nang maprotektahan ang sarili

ehersisyo muna sa Barangay Tignoan

doon sa covered court na aming tinuluyan

kaylakas ng hangin, talagang kabundukan

nilabhan nga nami'y natuyo agad naman

di ko alintana gaano man kahaba

ang kilo-kilometrong lalakaring sadya

mula General Nakar patungong Maynila

para sa isyu, ang pagod ay balewala

- gregoriovbituinjr.

02.17.2023

* kinatha sa umaga ng Alay-Lakad Laban sa Kaliwa Dam habang nagpapahinga sa covered court ng Brgy. Tignoan, Real, Quezon, ikapito ng umaga ay nag-umpisang muli ang lakaran

Layon ko

LAYON KO

naglakad ako para sa panitikan

isa iyan sa layon ko sa lakaran

sariling kayod para sa panulaan

na larangang aking pinagsisikapan

naglakad ako para sa katutubo

nang buhay at bukas nila'y di maglaho

naglakad din para sa lupang ninuno

dahil kapwa Pilipino at kadugo

tanto kong di ako magaling bumigkas

ng mga taludtod sa anyong madulas

ngunit sa mukha ko'y inyong mababakas

kung paano bang sa pagtula'y matimyas

totoo namang ako'y nagboluntaryo

upang makasama sa lakarang ito 

pagkat dama kong katutubo rin ako

at kaisa ng Dumagat-Remontado

sumama sa Lakad Laban sa Laiban Dam

na ilang taon na ang nakararaan;

sa Alay-Lakad Laban sa Kaliwa Dam

ngayon ay sumama sa kanilang laban

nawa'y magtagumpay ang aming adhika

na Kaliwa Dam ay matutulang sadya

pagkat sa Kaliwa Dam ang mapapala

ay pawang ligalig, kamatayan, sigwa

- gregoriovbituinjr.

02.17.2023

* kinatha ng madaling araw sa aming tinulugang covered court sa Brgy. Tignoan, Real, Quezon

* kasama ang makatang gala sa Alay-Lakad Laban sa Kaliwa Dam

Sa Tignoan

SA TIGNOAN

basketball court muli ang aming tinuluyan

malamig na semento'y muling tinulugan

bagamat may banig din naman sa pagitan

ngunit lamig ay tagos sa buto't kalamnan

kanina, dinaanan ang Departamento

ng Kalikasan ngunit tila walang tao

silang nakausap hinggil sana sa isyu

kaya napaaga sa destinasyong ito

tanong sa sarili'y ilang basketball court pa

sa siyam na araw ang tutulugan pa ba?

ngunit ito ang natanggap sa dami nila

ito ang binigay, sakripisyo talaga

tila kami mga mandirigmang Spartan

lalo't bilang namin ay nasa tatlong daan

siyam na lang para sa two hundred ninety one

na ektaryang masisira sa kabundukan

kung matutuloy ang dambuhalang proyekto

Sierra Madre'y lulubog sa dam na plano

lupang ninuno't katutubo'y apektado

sa kakulangan ng tubig, sagot ba'y ito?

o proyekto bang ito para sa ilan lang?

na pawang elitista ang makikinabang?

habang niluluray naman ang kalikasan

ah, isyung ito'y akin nang nakatulugan

- gregoriovbituinjr.

02.16.2023

* dapithapon kinatha ng makatang gala habang nagpapahinga sa covered court ng Brgy. Tignoan, Real, Quezon, kasama siya sa Alay-Lakad Laban sa Kaliwa Dam

15 Km. sa umaga

15 KM. SA UMAGA

umaga pa'y nakalabinlimang kilometro na

alas-sais pa lang, naglakad na kami, kay-aga

madaling araw nang umulan, kami'y nagising na

kaya nang magbukangliwayway ay agad lumarga

ilang beses kaming inulan sa dinaraanan

kaya basang-basa kami pati kagamitan

mabibilis ang lakad, matutulin bawat hakbang

narating ang basketball court ng Barangay Tignoan

may ilaw man ngunit walang saksakan ng kuryente

di maka-charge ng selpon, gayunman, ayos lang kami

di lang makapagpadala kay misis ng mensahe

at sabihing kami't nasa kalagayang mabuti

maagang nagpahinga, maaga kaming dumating

alas-dose pa lang, banig ay inilatag na rin

habang nadarama ang kaytinding hampas ng hangin

anong ginaw ng dapithapon, maging takipsilim

- gregoriovbituinjr.

02.16.2023

- kinatha manapos makapanghalian sa covered court ng Brgy. Tignoan, Real, Quezon, nilakad ay mula Km 129 hanggang Km114

Balikwas

BALIKWAS

alas-dos ng madaling araw ay napabalikwas

sa basketball court, ulan ay bumagsak ng malakas

at agad kaming nagsibangon upang makaiwas

sa ulan at karamdamang maaaring lumabas

mahirap magkasakit, mahaba pa ang lakarin

lalo't may tangan kaming adhikain at layunin

kaunting idlip lang, alas-tres na'y naligo na rin

di na nakatulog, naging abala sa sulatin

nang tumingala'y tila maulap ang kalangitan

gayong may sumilip na bituing nagkikislapan

na tila nagsasabing di matutuloy ang ulan

na magandang senyales sa mahaba pang lakaran

sana nga sa landasin, ulan ay di sumalubong

gayunman, kahit umulan ay di kami uurong

- gregoriovbituinjr.

02.16.2023

* kinatha madaling araw ng Alay-Lakad Laban sa Kaliwa Dam habang nagpapahinga sa covered court ng Brgy. Cawayan, Real, Quezon

Pagtatasa

PAGTATASA

munting pagtatasa matapos ang hapunan

gamit ang megaphone ay nagkatalakayan

may mga mungkahi't ilang problema naman

mabuti't nagsabi, nabigyang kalutasan

sinabi ang nadama, walang hinanakit

malinaw naman ang adhikain kung bakit

kaya pang lumakad, paa man ay sumakit

dahil may paninindigang dapat igiit

mabubuti naman ang mga payo't puna

ang huwag tumawid sa kabilang kalsada

sakali mang may matapilok, magpahinga

alas-dos ng madaling araw, maligo na

maghanda na ng alaxan at gamot ngayon

mahaba pa ang lakad bukas at maghapon

ihanda rin ang sumbrero pati na payong

na minungkahi sa mga nais tumulong

naroon kaming nagkakaisang tumindig

upang sa madla'y ipakitang kapitbisig

simpatya ng publiko sa isyu'y mahamig

doon kami binigyan ng tigisang banig

may mga tsinelas din daw na ibibigay

huwag ding lumabas sa lubid, nasa hanay

sa mga senyor na pagod, pwedeng sumakay

ikasiyam ng gabi'y natapos itong tunay

- gregoriovbituinjr.

02.15.2023

* kinatha sa gabi ng Alay-Lakad Laban sa Kaliwa Dam habang nagpapahinga sa covered court ng Brgy. Cawayan, Real, Quezon

Sa biglaang pag-ulan

SA BIGLAANG PAG-ULAN

habang naglalakad ay biglang bumuhos ang ulan 

ngunit wala kaming kapote o payong man lamang

basang-basa ang buong martsa't walang masilungan

sa Barangay Kiloloron na kami inabutan

ang mahabang manggas na polo ng aking katabi

ay binalabal sa akin ng matandang babae

marahil, akala'y katribu't sama-sama kami

sa sakripisyo upang maparating ang mensahe

balabal ay binalik ko nang inabot sa akin

ang isang dahon ng saging na ipinayong namin

isang babae'y nagbigay ng plastic bag na itim

upang aking sukbit na bag ay agad kong balutin

upang di mabasa ng ulan, hanggang sa tumila

dalawang katutubong talagang kahanga-hanga

dalawang may magagandang puso, sadyang dakila

salamat po, di ko malilimot ang inyong gawa

- gregoriovbituinjr.

02.15.2023

* kinatha sa gabi ng Alay-Lakad Laban sa Kaliwa Dam habang nagpapahinga sa covered court ng Brgy. Cawayan, Real, Quezon

Simula ng lakad

SIMULA NG LAKAD

mula Sulok sa General Nakar na'y nag-umpisa

ang aming paglalakad, ikapito ng umaga

mga lider-katutubo ang siyang nangunguna

sa simbahan ng Nakar, dumalo muna ng misa

nagpatuloy ang lakad hanggang bayan ng Infanta

sa isang basketball court kami'y nagsitigil muna

umupo at nakinig sa inihandang programa

maiinit na talumpati'y sadyang madarama

matapos iyon, nananghalian na't nagpahinga

bandang alas-dos ng hapon muli kaming lumarga

tangan ang adhikaing magtatagumpay ang masa

na proyektong Kaliwa Dam ay matigil talaga

- gregoriovbituinjr.

02.15.2023

* kinatha sa gabi ng Alay-Lakad Laban sa Kaliwa Dam habang nagpapahinga sa covered court ng Brgy. Cawayan, Real, Quezon

Madaling Araw sa Sulok

MADALING ARAW SA SULOK

naalimpungatan / sa madaling araw

doon sa aplaya'y / sadyang anong ginaw

ang papayang buwan / pala'y nakalitaw

tunay siyang gabay / sa amin tumanglaw

tila baga isang / payapang lakaran

ang kakaharapin / kundi man labanan

upang ipagtanggol / yaong kalupaan 

para sa kanila / ring kinabukasan

dinig ang ragasa / ng alon sa dagat

habang may ilan nang / gising at nagmulat

ramdam ang amihan / o baka habagat

tila nagbabadyang / tayo ay mag-ingat

kay-agang natulog / bandang alas-nwebe

alas-tres na'y gising, / kami na'y nagkape

- gregoriovbituinjr

02.15.2023 3:07am

* kinatha ng makatang gala habang nagpapahinga sa Sitio Sulok

Pagdatal sa Sulok

PAGDATAL SA SULOK

ikawalo ng gabi nakarating ng Infanta

at agad nagtraysikel sa Sitio Sulok nagpunta

upang doon ay magsimula bukas sa aplaya

kaylayo ng tinakbo at lubak pa ang kalsada

ang Legarda hanggang Infanta'y tatlong daang piso

sa bus, higit isandaan tatlumpung kilometro

Infanta hanggang Sulok, tantyang kilometro'y pito

tatlong daan din sa traysikel, kaymahal din nito

at doon kayraming tao na ang aking dinatnan

sa maraming kubo sa aplaya, naghuhuntahan

may kani-kanilang gamit, kasama sa lakaran

talagang handa na sa lakaran kinabukasan

sa isang mahabang bangko roon ako naidlip

mahangin, maginaw,, habang pag-asa'y halukipkip

matagumpay na lakaran ang sa puso'y lumakip

at ang kalikasan at lupang ninuno'y masagip

- gregoriovbituinjr.

02.14.2023

* kinatha habang nagpapahinga sa  isang bangko

* litratong kuha ng makatang gala habang naghahanda para sa Alay-Lakad 

Sa bus

SA BUS

nakasakay na ako ng bus patungong Infanta

eksaktong ikalawa ng hapon ay umandar na

naglalakbay ako sa panahong kaaya-aya

upang sa isang dakilang layon ay makiisa

mula Legarda, pamasahe'y tatlong daang piso

mabuti't sa bulsa'y may natatagong isang libo

pagbaba'y magta-traysikel, iyon kaya'y magkano

papuntang General Nakar na kaylayong totoo

mula roon ay siyam na araw naming lakaran

na tawag ay Alay-Lakad Laban sa Kaliwa Dam.

upang iparating ang mensahe sa sambayanan

na ayaw nila sa Kaliwa Dam, dapat tutulan

dahil ang kalikasan ay mawawasak na sadya

dahil ang kanilang lupang ninuno'y masisira

baka kinabukasan ng katutubo'y mawala

pag proyekto'y natayo, tahanan nila'y mawala

- gregoriovbituinjr.

02.14.2023

* selfie bago sumakay ng bus patungong Infanta, Quezon, sa Legarda, Maynila

Paggayak para sa mahabang lakaran

PAGGAYAK PARA SA MAHABANG LAKARAN

O, kaytagal kong naghintay ng mahabang lakaran

at may magandang pagkakataong dapat alayan

ng prinsipyo upang ipaglaban ang karapatan

sasama sa Alay-Lakad Laban sa Kaliwa Dam

matapos sumama mahigit nang isang dekada

sa Lakad Laban sa Laiban Dam muling nakiisa

upang lupang ninuno't katutubo'y madepensa

ngayon, sa isyung Kaliwa Dam naman ay sasama

sa paglalakad ay muling tutula't mag-uulat

mabatid ang kaibuturan at maisiwalat

noon, Lakad Laban sa Laiban Dam ay sinaaklat

ngayon, sa Kaliwa Dam ay muling gagawing sukat

ngayon ay naggagayak na sa mahabang lakaran

tsinelas, twalya, sipilyo, susuutin, kalamnan

makakain, inumin, kwaderno, bolpen, isipan

halina't sa paglalakad, kami'y inyong samahan

- gregoriovbituinjr.

02.14.2023

* ang Alay-Lakad Laban sa Kaliwa Dam ay magsisimula ng Pebrero 15-23, 2023 mula General Nakar sa Quezon Province hanggang sa Malakanyang

* ang litrato ay ang pabalat ng aklat na Lakad Laban sa Laiban Dam na nalathala noong 2009

* subaybayan ang facebook page na Earth Walker para sa ilang balita at tula habang naglalakbay

Sa anibersaryo ng kasal

SA ANIBERSARYO NG KASAL

ikaw ang sa puso'y sinisinta

sapagkat tangi kitang ligaya

nagkaniig, nagkaisa kita

sa hirap man laging magkasama

sa anibersaryo niring kasal

sa isip ko ngayon ay kumintal

na ating pag-ibig ay imortal

sa tuwa't dusa man ay tatagal

at ngayong Araw ng mga Puso

ay patuloy akong nanunuyo

ikaw lamang ang nirarahuyo

lalamunan man ay nanunuyo

anumang danas na kalagayan

dalawang pusong nag-unawaan

ay naging isa sa kalaunan

dahil sa matimyas na ibigan

- gregoriovbituinjr.

02.14.2023

* Pebrero 14, 2018 nang ikinasal kami sa kasalang bayan sa harap ng Mayor ng Tanay, Rizal, kung saan 59 na pares ang ikinasal.

Pagpunta sa presscon

PAGPUNTA SA PRESSCON

paglalakad muli laban sa dam

ang paksa ng presscon at nagpasya

sasama ako't ipapaalam

ang isyu sa mayorya ng masa

naglakad na kasi ako noon

yaong Lakad Laban sa Laiban Dam

isang dekada higit na iyon

na pagtutol sa dam ang inasam

tagos sa puso ang unang binhi

at sa pangalawa'y sasama rin

pinakinggan ko ang mga sanhi

maraming bayang palulubugin

narinig ang mga katutubo

sa talumpati nila sa presscon

kalikasan at lupang ninuno

ay sisirain ng dam na iyon

kaya ako'y agad nang nagpasya

na sasama muli sa lakaran

ang marinig ko sila'y sapat na

upang samahan sila sa laban

- gregoriovbituinjr.

02.13.2023

* ang litrato'y kuha ng makatang gala sa nasabing presscon

Dalawang Araw ng Puso

DALAWANG ARAW NG PUSO

Pebrero Katorse, Araw ng mga Puso

Setyembre Bente Nwebe, Araw din ng Puso

Una'y hinggil sa ating pagsinta't pagsuyo

Sunod, puso'y alagaan nang di maglaho

Una'y araw ng mga pusong nagniniig

Kung saan nadarama'y pintig ng pag-ibig

Sunod, pusong alaga'y di basta mayanig

Ng cardiac arrest kaya buhay pa'y lalawig

Di lamang pag-ibig kundi pangangatawan

Ang alalahanin nati't pangalagaan

Una'y batid bago pa magkaasawahan

Ikalwa'y pag nagsama na sa katandaan

Buhay pa rin tayo kapag puso'y nasawi

Sa atake sa puso'y dami nang nasawi

- gregoriovbituinjr.

02.12.2023

* February 14 is Valentine's Day

* September 29 is World Heart ❤️ Day

* litrato mula sa google

Sipnayan

SIPNAYAN

dapat pa ring di maging bantulot

sa aritmetika pag sumagot

at bakasakaling may mahugot

na iskemang sa diwa sumulpot

may numerong nakatagong sukat

kaya di maisiwa-siwalat

ngunit kung atin lang madalumat

ay parang babasaging may lamat

naririnig ko ang bawat hikbi

ng mga numerong inaglahi

di batid sila ba'y ngumingiti

sa kabila ng nadamang hapdi

ngunit sila ba'y numero lamang

gayong sipnayan ay nililinang

ang bilang nila'y di na mabilang

kapara'y gumagapang na langgam

- gregoriovbituinjr.

02.11.2023

* litrato mula sa pahayagang Pang-Masa, Pebrero 11, 2023, pahina 7

Pagninilay

PAGNINILAY

kaytahimik ng kapaligiran

may punong walang kadahon-dahon

tila nasa malayong silangan

alapaap ay paalon-alon

buti't nababahaw na ang sugat

habang sa kawalan nakatingin

ninais ko nang maisiwalat

ang pangyayaring di pa mapansin

hanging sariwa ang dumadampi

sa pisngi ko't pangang naninigas

tila nawala ang damang hapdi

ng loob kong nais nang mag-aklas

tahimik ngunit di pa payapa

pagkat loob pa'y tigib ng luha

- gregoriovbituinjr.

02.11.2023

Pagkalos

PAGKALOS

di man dalumat ang pangungusap

pagkat klima't sigwa ang kaharap

madadalumat din ang pangarap

kung pag-uusapan nating ganap

bakit patuloy ang pagdurusa

sa ating lipunan ng mayorya

wala bang magawa sa burgesya

at sa mga mapagsamantala

halina't dapat tayong magbuklod

upang pagbabago'y itaguyod

mag-usap, huwag basta susugod

mag-isip kung paano sasakyod

sa sistemang bulok na lumumpo

sa ating karapatang pantao;

maghanda sa pagsuong sa bagyo

at kalusin na ang mga tuso

na nagpapakabundat ngang sadya

sa binarat na lakas-paggawa

na di binabayaran ng tama

bundat silang talagang kuhila

dapat nang tayo'y magkapitbisig

at panawagan ay isatinig

upang ang mga tuso'y mausig

upang mga kuhila'y malupig

- gregoriovbituinjr.

02.11.2023

Liwayway

LIWAYWAY

kaysarap makatunghay

ng nobela, sanaysay

kwento'y mabasang tunay

sa magasing Liwayway

pagkat nananariwa

ang aking pagkabata

nahalina sa tula

at ngayon kumakatha

buti't may babasahin

tulad nitong magasin

na binibigyang-pansin

ang pagkamalikhain

dati ay linggo-linggo

bente pesos ang presyo

kada buwan na ito

at isangdaang piso

kahit na nagmahalan

ay sinusuportahan

pagkat ito'y lagakan

ng ating panitikan

baya'y di nagsasalat

kapag may nag-iingat

ng panitikang mulat

sa haraya'y dalumat

- gregoriovbituinjr.

02.10.2023