Ang awiting Heal the World ni Michael Jackson

ANG AWITING "HEAL THE WORLD" NI MICHAEL JACKSON

halina't pakinggan ang Heal the World ni Michael Jackson
sapagkat awiting ito'y isang mensahe't hamon
tila ba sa plastik at usok, tao'y nagugumon
at mga isda sa dagat, upos ang nilululon

halina't awiting Heal the World ay ating suriin
ang mensahe'y sa kapwa tao inihahabilin
sakit nitong mundo'y tulong-tulong nating gamutin
paano ba kanser ng lipunan ay lulutasin

daigdig bang tahanan nati'y sakbibi na ng lumbay
pagkat pinababayaan natin itong maluray
ng usok ng kapitalismong naninirang tunay
sa ngalan ng tubo, kalikasa'y ginutay-gutay

huwag nating ipagwalangbahala't isantabi
kundi damhin natin ang awit, ang kanyang mensahe
ang habilin sa ating kumilos at maging saksi
upang henerasyon nati'y di magsisi sa huli

- gregbituinjr.

Ating pangalagaan si Inang Kalikasan

ATING PANGALAGAAN 
SI INANG KALIKASAN

* Sinubukan kong magsulat ng tula sa parang pang-huweteng na papel, at nakabuo ng isang tula. Ito yung tinabas kong long bond paper upang gawing short. Pitong pantig bawat taludtod.

ating pangalagaan
si Inang Kalikasan
kanyang sinapupunan
ang ating pinagmulan

di ba't kaibig-ibig
ang buhay sa daigdig
ano't tayo'y natulig
sa plastik na bumikig

ang basura'y nagkalat
pulos plastik ang dagat
kung saan-saan nagbuhat
lamok na'y nangangagat

sinong dapat sisihin
di ba't tayo na nga rin
ang ugaling waldasin
ay tigilan na natin

halina't magkaisa
ayusin ang basura
huwag nang magtapon pa
sa dagat at kalsada

tipunin din ang plastik
subukang i-ekobrik
sa botelya'y isiksik
ngunit huwag idikdik

tanaw ang hinaharap
di malambong ang ulap
at tayo nang magsikap
buuin ang pangarap

- gregbituinjr./02-19-2019

Sino nga ba ang sinungaling?

sino nga ba ang sinungaling kundi mga trapo
pag kampanyahan, pangako doon, pangako dito
at nagtungo pa sa iskwater upang maiboto
gayong pag naupo na, dukha'y nalimot na nito

akala mo nga, pag magsalita, ang galing-galing
mga trapong kung pumustura'y bayaning magiting
iyon pala, pag naupo, sa dayo gugupiling
sa kapital nangayupapa silang sinungaling

sadyang sinungaling ang mga trapong elitista
pawang utak-negosyo imbes serbisyo sa masa
huwag iboto ang mga trapong kapitalista
silang nais manatili ang bulok na sistema

mga trapong kuhila'y di naman natin kauri
kandidato ng paggawa ang ating ipagwagi

- gregbituinjr.

Pakibalik po ang charger, maraming salamat po

PAKIBALIK PO ANG CHARGER, MARAMING SALAMAT PO

Bakit kayhilig mong manghiram ng charger, tanong ko

Bakit di ka mag-ipon nang makabili ka nito?

Di naman nagdadamot ngunit dapat mabatid mo

Kami ang di makagamit pag kailangan ito.

Payo ko'y huwag kang mahirati sa panghihiram

Lalo't ang hinihiram mo'y lagi mong kailangan

Matuto kang bumili at charger ay pag-ipunan

Lalo't oras-oras mo'y selfon ang katalakayan.

Ayos lang sana kung ang paghiram mo'y isang beses

Subalit kung araw-araw na, ito'y labis-labis

Baka sa susunod, para ka nang taong may galis

Iniiwasan ka pagkat sa iyo'y naiinis.

At kung nakahiram ka'y matuto ka ring magbalik

Kawawa ang hiniraman mong nais ding gumamit

Baka sa kahihintay sa iyo, mata'y tumirik

Nakahiram ka na nga'y nais mo pang may kagalit.

O kaya'y ibigay na namin ang charger sa iyo

At kami na lang ang bibili ng charger na bago

Sana'y masaya ka na't huwag nang mang-iistorbo

Dahil mayroon ka nang charger na solong-solo mo.

- gregbituinjr.

Bakit malupit mag-yosi break?

BAKIT MALUPIT MAG-YOSI BREAK?

yosi break na rin ang tawag ko sa munting pahinga
di naman nagyoyosi't tunganga lang sa kalsada
naroong nagninilay habang namamalikmata
na may naglalakad na isang magandang dalaga

kailangang mamahinga sandali't mag-yosi break
lalo't napakabanas at araw ay nakatirik
di man nagyoyosi, sa pamamahinga na'y sabik
pagkat panahon ng pagkatha, ilantad ang hibik

ang iba'y nagyoyosi't nasasarapang humitit
ramdam nila'y ginhawa habang upos nakadikit
sa labi, habang nagkukwento siya't nangungulit
sa kausap, at baka may kung anong hinihirit

anong lupit mag-yosi break, humihiram ng alwan
kahit man lang sumandali, ginhawa'y maramdaman

- gregbituinjr.

Ang buhay ba'y tulad ng mobius strip?

ANG BUHAY BA'Y TULAD NG MOBIUS STRIP?

ang buhay ba'y tulad ng mobius strip?

hinehele't tila nananaginip

na lagi nang buhay ay sinasagip

habang patuloy na may nililirip

hinggil sa kung anumang halukipkip

tila dinugtong na magkabaligtad

ang mga dulo ng gomang malapad

madaraanan lahat pag naglakad

pabalik-balik ka kahit umigtad

ganito ba ang anyo ng pag-unlad?

paikot-ikot ka lang sa simula

hanggang maramdaman mong matulala

mabuting patuloy na gumagawa

kaysa naman magpahila-hilata

bakasakaling tayo'y may mapala

ang mobius strip ay pakasuriin

sa matematika'y alalahanin

baka may problemang mahagip na rin

masagip ang pinoproblema natin

upang sa baha'y di tayo lunurin

- gregbituinjr.

Napulot man ako sa tae ng kalabaw

NAPULOT MAN AKO SA TAE NG KALABAW

napulot man ako sa tae ng kalabaw
ako'y isang tao rin sa mundong ibabaw
na maagang gumising sa madaling araw
upang agad magtrabaho kahit maginaw

mapalad naman ako't may mga umampon
at itinuring akong anak nilang bugtong
mag-asawang walang anak, sa utang baon
ngunit kaysisipag, sa bukid lumulusong

silang nagisnan ko nga'y mapagkawanggawa
mula pagkabata ko'y mga nag-alaga
binihisan, pinag-aral, lahat ginawa
upang ako nama'y makadamang ginhawa

kaya ako'y labis na nagpapasalamat
sa kanilang naglunas sa pusong may sugat
may ligaya sa diwa kong maraming pilat
pagkat sila'y dakila't tunay na alamat

- gregbituinjr.

Batang bilanggo, edad siyam?

BATANG BILANGGO, EDAD SIYAM?

tama bang sa edad siyam, ang bata na'y mapiit?
hustisya na ba sa bansa'y ganito na kalupit?
sa murang gulang, karapatan niya'y pinagkait
kinulong dahil sindikato sa kanya'y gumamit

batang edad siyam ay dapat na raw maikulong
panukalang ito sa Kongreso'y isinusulong
pag bata'y gumawa ng krimen at agad sinuplong
kulong agad habang laya ang nag-atas na buhong!

ano nang nangyari sa ating mga mambabatas?
krimen ba'y di na kaya ng kapulisang malutas?
di na mapigil ng maykapangyarihan ang dahas?
mga sakit ba ng lipunan ay wala nang lunas?

mga magulang ba ng batang bilanggo'y pabaya?
bakit magulang ay kayod ng kayod ngunit dukha?
mga bata ba'y inabandona na't isinumpa?
o problema'y ang sistemang nagdulot ng dalita?

bakit nais makulong ang bata, ano ang sanhi?
halina't pag-isipan, patuloy tayong magsuri
dulot kaya ito ng pagkakaiba sa uri?
o baka mambabatas ay hungkag ang mga budhi?

- gregbituinjr.

Ang unang tungkulin

ANG UNANG TUNGKULIN

“The first duty of a revolutionary is to be educated.” ~ Che Guevara

noong ako'y bagong tibak, laging ipinapayo
pag-aralan ang lipunan, kalagayan ng mundo
makipamuhay sa masa, alamin ang siphayo
ng mga dukhang kayraming pangarap na gumuho

bakit kapitalismo ang sistemang umiiral
bakit lipunan ay pinatatakbo ng kapital
bakit obrerong kayod kalabaw ang nagpapagal
bakit ang karapatan sa edukasyon ay mahal

ang mga aktibista'y nakikibakang totoo
upang malubos-lubos ang karapatang pantao
hanggang sa mag-pultaym na't maging rebolusyonaryo
na unang tungkulin sa pakikibaka'y matuto

aralin ang lipunan, makipagbalitaktakan
aralin bakit may mahirap, bakit may mayaman
suriin bakit pribadong pag-aari'y dahilan
ng paghihirap ng mayorya sa sandaigdigan

sa gayon, magkaisa sa paghahanap ng solusyon
pagwasak sa pribadong pag-aari'y ating layon
bakit obrero'y dapat mamuno sa rebolusyon
bakit sa pagbabagong hangad tayo nakatuon

- gregbituinjr.

Tibuyô

TIBUYÔ

Mayroong pagpapahalaga sa kinabukasan
Ito ang naiisip ng ama sa mga anak
Kaya binigyan ng tig-isang tibuyong kawayan
Upang samutsaring barya'y doon nila ilagak.

Iyon marahil ang lunas sa kakapusan nila
Habang pinapangarap ang buhay na maginhawa.
Dapat mag-ipon, magsikap sa kabila ng dusa
Upang sa hinaharap, tuwa'y papalit sa luha.

At malaking hamon ang pag-iipon sa tibuyô
Papiso-piso muna, limang piso, sampung piso.
At ang paniwala ng magkapatid ay nabuô
Maliit, lalago, tulad ng ambong naging bagyo.

Tibuyo'y pupunuin ng pagsuyo't pagsisikap
Upang balang araw, maabot nila ang pangarap.

- gregbituinjr.

*TIBUYÔ - tagalog (Batangas) sa salitang Kastilang 'alkansya'

Di na kumapit sa baywang ni misis sa dyip

di na ako kumapit sa baywang ni misis sa dyip

baka mapagkamalang pitaka ang hinahagip

lalo na't katabing pasahero'y nananaginip

kaysarap ng hilik habang bag niya'y halukipkip

isang dahilan yaon bakit ayokong kumapit

sa baywang ni misis lalo't suot niya'y di hapit

gayon kasi'y modus operandi ng mangungupit

laking lungsod akong saksi sa gawaing kaylupit

kaya mabuting mag-ingat ka sa dyip na masikip

dapat maging listo kang lagi't mababaw ang idlip

kung kakapit kay misis sa dyip, gamitin ang isip

huwag sa baywang, baka pagkamalan ka't madakip

ang kumapit sa baywang ni misis ay kanyang giit

subalit dahil sa sitwasyon, di ako napilit

kung dahil sa pagkapit sa baywang niya'y mapiit

maiging sa bisig na lang ni misis mangunyapit

- gregbituinjr.

Daigdig ba'y basurahan?

Kung saan-saan siniksik
ang mga basurang plastik
na sa lupa't dagat hasik!
Di pa ba tayo iimik?

Daigdig ba'y basurahan?
Pilipinas ba'y tapunan?
Dapat tayong magtulungan
nang ito'y masolusyunan!

Tayo lang ba'y tatahimik
at magpapatumpik-tumpik?
Baka plastik na'y magputik
na sa bansa'y magpatirik!

- gregbituinjr.

Patuloy lang

PATULOY LANG

patuloy akong magsusulat
ng mga tulang walang puknat
na kadalasang nagbubuhat
sa harayang di ko masukat

patuloy ako sa paglikha
ng sangkaterbang mga tula
magpapatuloy sa pagkatha
hinggil sa samutsaring paksa

patuloy hanggang kamatayan
sulat ng sulat sa aklatan
sulat ng sulat ng aklasan
susulat hanggang katapusan

magpapatuloy lang sa mundo
ang manunulat na tulad ko
susulatin ang kahit ano
susulat kahit di na uso

- gregbituinjr.

Naglulunoy pa rin sa saluysoy

naglulunoy pa rin sa saluysoy
kahit ako'y nagbabalinguyngoy
natanaw kong paligid na'y luoy
tila baga ako'y sinusuysoy
hanggang tahakin ko na'y kumunoy

- gregbituinjr.

Huwag kang mandaraya

HUWAG KANG MANDARAYA

“I would prefer even to fail with honor than win by cheating.” ~ Sophocles

parating muli ang pagsusulit sa paaralan
parating muli ang halalan at magbobotohan
upang makapasa'y mandadaya't magkokopyahan
upang manalo ang manok, mandaraya na naman

gagawa ng paraan upang sila'y makapasa
imbes na magsunog ng kilay o magrebyu sila
katabi'y kakalabitin upang makapangopya
o nakasulat na sa munting papel ang pormula

maliit lang ang sweldo'y nag-aagawan sa pwesto
kongresista, senador, pangulo'y magkanong sweldo
anong prinsipyo ito't sa pwesto'y nagkakagulo?
kapag ba nakapwesto, may proteksyon ang negosyo?

mabuti nang mabigong ang pagkatao'y may dangal
kaysa mandaya't manalong dangal mo'y nasa kanal
mabuting magsikap, magtagumpay sa pagpapagal
kaysa manalong sarili'y tinulad sa pusakal

- gregbituinjr.

Di tulad ng dagsin ang himagsikan

DI TULAD NG DAGSIN ANG HIMAGSIKAN

“The revolution is not an apple that falls when it is ripe. You have to make it fall.” ~ Che Guevara

* DAGSIN - salin sa wikang Filipino ng GRAVITY

may bumagsak na isang mansanas sa ulo noon
ng siyentipikong nagngangalang Isaac Newton
marahil nahinog ang mansanas sa punong yaon
nang bumagsak ay napagtanto niyang dagsin iyon

malakas ang enerhiyang humihila pababa
ang mula sa itaas ay babagsak din sa lupa
anumang itapon pataas, malalaglag sadya
sa Ingles: GRAVITY; at DAGSIN sa sariling wika

ngunit rebolusyonaryong si Che ay may banggit din
anumang himagsika'y pagsikapan nating gawin
di iyon tulad ng mansanas na babagsak man din
yao'y dapat pahinugin, pitasin, pabagsakin

ang tuklas ni Newton, ang ideya ni Che Guevara
sa ati't mga susunod pa'y kanilang pamana
halina't pagnilayang mabuti ang sabi nila
kung ating matatanto'y maganda ang ibubunga

- gregbituinjr.

Mabuti nang mamatay na naninindigan

“Better to die standing than to live on your knees.” ~ Che Guevara

mga kasama, patuloy tayong tumindig
sa ating simulain ay magkapitbisig
mga trapong kawatan ay dapat mausig
at kaaway ng sambayanan ay malupig

mabuti nang mamatay na naninindigan
kaysa mamatay nang dahil sa karuwagan
mabuti nang mamatay tayong lumalaban
kaysa lumuhod sa naghahari-harian

ating tinahak na puno ng sakripisyo
iyang bilin ng mga rebolusyonaryo
halina't itayo kasama ng obrero
ang pangarap nating lipunang makatao

- gregbituinjr.

Sa kaarawan ng aking palangga

SA KAARAWAN NG AKING PALANGGA
Enero 6, 2019

pagbati ko sa kaarawan ng aking palangga
na aking katuwang sa simulain ko't adhika
para sa pamilya, para sa bayan at sa madla
matapang, matatag, mataktika, kahanga-hanga

mabuhay ka, aking palangga, sa husay mo't galing
matulungin, malikhain at mahusay sa sining
kaygandang umawit, kaysarap kausap, kaylambing
magaling makipagkapwa-tao't sadyang magiting

nakahanda kang lagi sa pagsalunga sa agos
lalo't batid mong kapwa'y inapi't binubusabos
magaling makisama, tinutulungan ang kapos
para sa karapatan ay handang makipagtuos

sa mahal kong palangga, maligayang kaarawan
nawa'y gumanda pang lalo ang iyong kalusugan
halina't buuin natin ang masayang tahanan
nawa bata'y malusog sa iyong sinapupunan

- gregbituinjr.

Pagpaslang ng ina sa 6-anyos na anak

minsan, dulot ng pagkainis ay pagkapahamak
at kadalasan ang nangyayari'y nakasisindak
dahil lamang ayaw uminom ng gamot ang anak
na anim-na-taong gulang, nanay pa ang nanapak

anong klaseng ina ang di marunong magpasensya
sa nilalagnat na anak, bakit mamamalo pa
baka mapakla ang gamot, di ayon sa panlasa
kaya sana ina'y umunawa, di mairita

namalo nang namalo upang gamot ay ipilit
hanggang mahulog sa unang palapag yaong paslit
dapat ina'y malitis, maparusahan, mapiit
dapat panagutan ang sa anak niya'y sinapit

karapatan ng batang huwag dahasin ninuman
kahit inang nagluwal ay di siya dapat saktan
ang Convention on the Rights of the Child ay dapat alam
ng lahat ng magulang at lahat ng mamamayan

- gregbituinjr.
(Batay sa ulat sa pahayagang Bulgar na may pamagat na "6 yrs. old, Ginulpi ni Mommy, Patay", Enero 3, 2019, p. 1 & 2)

Bagong Taon, Lumang Sistenma

BAGONG TAON, LUMANG SISTEMA

panibagong petsa na naman ang papalit ngayon
tulad ng kalendaryong nagpapalit taun-taon
bulok pa rin ang sistema't dapat magrebolusyon
pagkat petsa lang ang nagbabago sa Bagong Taon

lumang sistema, Bagong Taon, iyan ang totoo
ang kalagayan ng masa'y di pa rin nagbabago
manggagawa'y kontraktwal pa rin, mababa ang sweldo
uring obrero'y alipin pa ng kapitalismo

ang Bagong Taon pa'y sinasalubong ng paputok
tila katatagan ng bawat isa'y sinusubok
animo'y digma, nagpuputukan, nakikihamok
kayraming putok na kamay nang lumipas ang usok

Bagong Taon, lumang sistema, ang katotohanan
elitista pa rin itong naghahari-harian
kailangan pa rin nating maghimagsik, lumaban
upang itayo ang isang makataong lipunan

- gregbituinjr.